नब्बे बिहे गर्दा पनि पुगेन्

'बाह्र छोरा तेह्र नाति बूढाको धोक्रो काधैँमाथि भन्ने नेपाली उखान चरितार्थ गरेका छन् सत्तरी वर्षे नाइजेरियन बेलो मसाबाले । नब्बे बिहे गरिसकेका मसाबा अझै थप दस बिहे गर्न चाहन्छन् । उनी यत्तिका बिहे गर्नुको करामत अल्लाह (भगवान्) भएको बताउँछन् । भगवान्कै निर्देशनमा सबै बिहे जुरेको उनको दाबी छ ।

नाइजेरियाको संविधानले बहुविवाह गर्नेलाई कुनै रोकतोक गरेको छैन । नत उनलाई बढी श्रीमतीले तनाब नै थपेको छ । मध्य नाइजेरिया सहरमा बस्दै आएको बेलोले बिबिसीसँगको भेटमा भने, 'सुरु-सुरुमा महिला देखेर निकै डर लाग्थ्यो । त्यसैले दुईवटासम्म बिहे गर्ने सोचमा थिए । तर, बिहे गर्दै गएपछि इच्छा बढ्दै गयो ।'

'म कहिले पनि महिलाको पछि लागिनँ, उनीहरूले नै मेरो पिछा गर्छन्, जब उनीहरू आएर म तिम्रो पत्नी हुन चाहन्छु भन्छन् अनि राजीखुसीमा बिहे गरिहाल्छु ।'-उनी भन्छन् ।

परिवार नियोजनका साधनका प्रयोग गर्नुलाई पनि उनी भगवान्को इच्छाविपरीत ठान्छन् । मसाबा भन्छन् 'अल्लाहको इच्छाविपरीत जान मन मान्दैन ।' उनका दुई सय सन्तानमध्ये ५५ को मृत्यु भइसकेको छ ।

तीन, पाँच र चौबीसौँ नम्बर श्रीमतीको उनलाई एकदम माया लाग्छ । किन ? उनीहरू जहाँ पनि बेलोको प्रशंसा गर्छन् । उनको मान्यता छ, 'इमानी पुरुषले जति नै बिहे गर्दा पनि फरक पर्दैन ।'

यतिका श्रीमती भए पनि कोही कसैसँग इष्र्या राख्दैनन् । तर, दुर्भाग्य उनकी दोस्री श्रीमतीको टकरावले एघारौँलाई तलाक दिनुपरेको थियो । यसबारे उनको भनाइ छ, 'उनले केही कुरा नमानेपछि फिर्ता पठाए ।'